今朝早浪向冷吗？不晓得侬是啥感觉，因为我上早班，所以四五点钟就要从热烔烔的被窝里爬出来出门去上班，有辰光真的是有点吃不消，因为一天里向最冷的，大概就是这个辰光。天气预报讲，今朝上海市区最低在零度上下，郊区要到零下4到零下2度，不晓得侬蹲的地方看到结冰了吗？ 

不过，今朝虽然冷，但是跟前两日相比已经好交关了，因为今朝是晴冷，前两日雨水滴粒溚辣落不停，是湿冷，天嘛阴势刮搭，人走在路上是䞤头缩颈，风嘛钻到头颈里是寒丝丝、冷飕飕，实在有点吃不消挡不住。

今朝早浪向，虽然我也是冻得刮刮抖，但是白天太阳出来了，就适意交关了。外加天气预报还讲了，这个礼拜除脱明后天有点小雨，其他基本上侪是多云天气，到了周末最高气温还有可能升到15℃，外加不落雨，想想就觉得蛮适意开心的，搿个季节，上海有啥地方好去白相相跑跑呢，评论区里告诉我！

（看看新闻Knews记者：刘晔 张峥嵘 审核：夏进 特约撰稿：朱贞淼 实习生：秦晨  ）